Mbrëmjen e djeshme u luajt takimi hapës i javës së 24-t të Kategorisë Superiore, ndeshja mes Tiranës dhe Partizanit.
Ndërsa sot do të luhen 4 ndeshje të cilat e përmbyllin këtë javë futbollistike. Tre takime luhen në orën 14:00. Bylisi, që ende nuk e ka provuar shijen e fitores në kampionat për këtë vit, duhet të mposhtë Flamurtarin e vendit të fundit. Në fazën e parë i ka ndëshkuar vlonjatët me goleadë. Sot mjaftojnë tre pikët, ato janë më të rëndësishmet.
Laçi udhëton në Gjirokastër për tu përballur me Luftëtarin. Fazën e parë në Gjirokastër kanë marrë vetëm një barazim, por këtë herë duhet të marrin pikët e plota pasi kanë mundësinë të barazojnë me pikë Partizanin.
Po në orën 14:00 luhet edhe një tjetër përballje interesante, e gjitha për t’u parë. Vllaznia-Skënderbeu i ka të tria rezultatet brenda. Korçarët po kalojnë një formë të mirë, ndërkohë që nuk duhet harruar se këtë sezon shkodranët i kanë fituar të dyja takimet kundër skuadrës së drejtuar nga Ilir Daja.
Ndërsa java e 24-t e Superiores mbyllet me supersfidën mes Teutës dhe Kukësit në orën 17:00. Një ndeshje shumë e rëndësishme për të dyja ekipet teksa bregdetarët kërkojnë fitoren për të vazhduar betejën për një vend në kompeticionet Europiane ndërsa për mysafirët fitorja është detyrim për të mos lejuar Tiranën të shkëputet në krye.
