Ndryshe nga kreditimit, që rezultoi në ulje, janari ka qenë pozitiv për sistemin bankar sa i përket depozitave. Statistikat e Bankës së Shqipërisë bënë të ditur se në janar, stoku i depozitave arriti në 1.04 trilionë lekë (rreth 8.4 miliardë euro), me një rritje prej 10%, duke vijuar tendencën pozitive të dhjetorit, me këtë të fundit që është karakteristikë për shkak të prurjeve që sjellin emigrantët, që kthehen për pushime.
Por, në janar tradicionalisht depozitat qëndrojnë në stanjacion, ose dhe bien, kurse janari i këtij viti dhe ai i vitit të kaluar ka pasur një tendencë të pazakontë, duke shënuar një rritje rekord mujore, në një tendencë që reflekton një tendencë të bizneseve dhe individëve për të kursyer.
Rreth 70% e shtesës së depozitave në janar erdhi nga valuta dhe pjesa tjetër nga leku. Rritje kanë shënuar si depozitat e individëve ashtu dhe të bizneseve në valutë. Edhe në lekë, zgjerim kanë shënuar kursimet si të individëve ashtu dhe sipërmarrjeve, por në llogari pa afat.
Për shkak të rritjes së depozitave në valutë me ritme më të shpejta se ato në lekë, pesha e kursimeve në lekë është tkurrur më tej në janar, duke zbritur në 45.28% të totalit, nga 45.89% që ishte në janar të një viti më parë.
Me bazë vjetore (janar 2020/janar 2019), depozitat në ekonomi janë rritur me 3.4%, duke shënuar një performancë pozitive, pas një tendence stanjacioni që kishin shfaqur tre vitet e fundit.
Rritja vjetore ka qenë më e shpejtë për kursimet në valutë, të cilat janë zgjeruar me 4%, kundrejt 2% që ishte shtimi i depozitave në monedhën vendase.
Shqipëria rezulton me një nivel të lartë depozitash ndaj prodhimit të brendshëm bruto, me rreth 61% të PBB-së, ndër më të lartat në rajon, të nxitura nga prurjet e larta të emigrantëve, që kulmojnë në gusht dhe dhjetor. /Monitor/
