Përfaqësuesi i PS në Këshillin Politik, për reformën zgjedhore, Damian Gjiknuri, u shpreh pas mbledhjes së sotme, se në parim, i mbështet propozimet e PD për identifikimin dhe votimin elektronik. Sipas tij, kjo do të conte pak a shumë edhe në depolitizimin e trupave që menaxhojnë procesin zgjedhor.
Gjiknuri tha se megjithatë, do të duhet të merret konsulenca e institucioneve të specializuara dhe ekspertëve ndërkombëtarë. Ndërkohë, Rudina Hajdari u shpreh se ka paraqitur sot një propozim për t’i bërë vetting kandidatëve për deputetë dhe kryetarë bashkie, sidomos lidhur me të kaluarën e tyre nëse kanë qënë apo jo bashkëpunëtorë të sigurimit të shtetit. Hajdari tha se ky propozim u mirëprit.
Po ashtu, Hajdari konfirmoi se kishte dakordësi për futjen e teknologjisë në zgjedhje, si identifikimi dhe votimi elektronik. Petrit Vasili i LSI u shpreh se propozimi i opozitës së bashkuar për votim, numërim dhe identifikim elektronik, rrit garancinë e votësm dhe rrit besimin e publikut. Vasili shtoi se ofrimi i garancive për votën e lirë, justifikon cdo lloj kostoje.
Përfaqësuesi i Partisë Demokratike, Oerd Bylykbashi u shpreh se identifikimi dhe votimi elekronik mënjanon shumë abuzime dhe manipulime, që bëhen sidomos me votën e emigrantëve.
Bylykbashi theksoi se propozimi i PD kërkon vullnet politik, të cilin ai e dyshon tek Edi Rama. Megjithatë, ai pranoi se do ti jepet një kohë e mjaftueshme mazhorancës për ta analizuar dhe vendosur. Ndërkohë, të martën që vjen, Këshilli Politik, do të diskutojë mbi sistemin zgjedhor.
