Presidenti Ilir Meta përmes një postimi në rrjet ka falenderuar Sajmir Kodra dhe Gentian Zenelaj, moderatorët e emisionit “Stop”, të cilët deklaruan se do të marrin pjesë në protestën e thirrur më 2 mars nga Kreu i Shtetit për atë që ai e cilëson si “mbrojtja e Kushtetutës”.
Meta ka paralajmëruar se do të firmosë publikisht dekretin e parë për zhbërjen e grushtit të shtetit, që sipas tij synon kapjen e Gjykatës Kushtetuese.
“E pranoj kritikën me vend të dy moderatorëve brilantë të emisionit të mirënjohur investigativ STOP, Saimirit dhe Gentit!
Por bashkë me ndjesën publike për këtë falenderim “paksa të vonuar”, por që s’do të mungonte, nuk mund të mos e shpreh krenarinë që dy zëdhënës kaq të fuqishëm të interesit publik, i bashkohen kauzës sonë të përbashkët në mbrojtje të Kushtetutës, shtetit ligjor, demokracisë, të drejtave e lirive të qytetarëve, të cilat ata përpiqen t’i mbrojnë çdo ditë, me kurajo, profesionalizëm dhe sakrifica”, shkruan Meta në postimin e tij në rrjet.
Në vijim ai i ka drejtuar një apel qytetarëve t’i bashkohen protesteës, që do të mbahet në bulevardin “Dëshmorët e Kombit”.
“Së bashku në Manifestimin Mbarëkombëtar në 2 mars edhe për lirinë e pavarësinë e medias, në mbrojtje të Kushtetutës dhe të Shqipërisë, kundër grushtit të shtetit”, mbyll mesazhin e tij Meta.
