Komisariati i Policisë Nr. 2 në Tiranë ka ekzekutuar një operacion mbrëmjen e djeshme ku ka goditur një bandë grabitësish që vepronin në kryeqytet dhe në disa qarqe të tjera për vjedhje kasafortash të bizneseve.
Nga ky operacioni i koduar “Poliklinika” janë arrestuar tre persona, më konkretisht shtetasit Enis Mara, 33 vjeç, Fatjon Shahini alias Fatjon Lila, 37 vjeç dhe Euklid Çelmeta alias Euklid Habili, 38 vjeç, banues në Tiranë (Fatjon Lila dhe Euklid Çelmeta, me precedent penal në fushën e vjedhjes dhe vjedhjes me armë).
Sipas policisë, “arrestimi i tyre u bë pasi, po sot rreth orës 04:05 të mëngjesit, në vendin e quajtur Rruga e Kavajës, në ambientet e Poliklinikës “Zonja e Këshillit të Mirë”, Tiranë, në bashkëpunim edhe me dy persona të tjerë, kanë vjedhur një kasafortë në të cilin ndodhej vlera monetare rreth 13 milion lekë të vjetra”.
Gjatë veprimeve hetimore janë sekuestruar në cilësinë e provës materiale sendet si më poshtë:
-Një automjet Mercedes Benz, me të cilin qarkullonin për të kryer vjedhjet, 1 DVR, një shumë parash, 1 kasafortë dhe 4 telefona celular.
Gjithashtu këta shtetas nga hetimet rezulton se në bashkëpunim me njëri-tjetrin dyshohen si autorë të vjedhjes së një klinike mjekësore në Rrugën e Dibrës, ngjarje e datës 20.01.2020, ku gjatë orëve të para të mëngjesit kanë vjedhur një shumë prej 413 000 lekësh dhe kanë tentuar të vjedhin edhe kasafortën e kësaj klinike.
Sipas burimeve zyrtare, këta shtetas dyshohen se kanë kryer një sërë vjedhjesh të kasafortave në biznese, në qytetin e Tiranës dhe në qarqe të tjera.
Policia bën me dije se vijon puna për dokumentimin me prova ligjore të rasteve të dyshuara se janë kryer nga ky grup kriminal.
Materialet iu dërguan Prokurorisë së Rrethit Gjyqësor Tiranë, për veprime të mëtejshme, si dhe po punohet për identifikimin dhe kapjen e autoreve të tjerë të përfshirë në këtë ngjarje.
Kush janë Fatjon Lila dhe Euklid Habili, dhe e kaluara e tyre kriminale:
Të dy këta shtetas janë të njohur si hajdutë serialë nga drejtësia për ngjarje të tjera të vjedhjes së kasafortave të bizneseve në vitet e kaluara.
Në 18 qershor të 2018-tës grupi prej 5 personash ku bënte pjesë edhe Fatjon Lila dhe Euklid Habili u godit nga uniformat blu, ku mes tyre ishte dhe një ish-oficer policie dhe Gjon Pelivani i njohur si armik i Shullazit, të gjithë të dënuar më parë për vjedhje.
Të arrestuarit ishin pjesë e grupit ‘Hijet e Natës’ ku vodhën 11 kasaforta edhe ambasadën daneze në Tiranë. Fatjon Lila dhe Euklid Habili të arrestuar në 2018, nuk dihet si kanë arritur që të shpëtojnë nga burg pas akuzave që u ngritën kundër tyre, ndërsa iu rikthyen sërish zakonit duke vjedhur sapo fituan lirinë, por policia i kishte në monitorim duke i arrestuar sërish.
