Siao Jao, vetëm 27 vjeç, u habit kur mori vesh se ishte infektuar me koronavirus. Ai mendon se është prekur nga virusi kur u kthye me tren në shtëpi pasi festoi vitin e ri kinez në Dingzo.
Siao punon në Chengu, në jug-perëndim të Kinës. “Befasisht më kapi temperatura e lartë. Më kapi paniku. Nuk dija ç’të bëja. Kisha përshtypjen se s’duhet të shkoja në spital sepse atje sëmuren dhe më shumë”, është shprehur Jao për mediat.
Sao u vendos në një dhomë hoteli dhe qëndroi aty për një javë i mbyllur. Ai vazhdimisht merrte ilaçe për të ulur temperaturën dhe konsultohej me mjekët përmes internetit.
Më tej, i riu ka treguar se filloi të përjetonte haluçinacione dhe mendonte se në dhomë po i ‘fluturonin objektet’. Të nesërmen e kuptoi se në dhomë i kishte hyrë një lakuriq nate dhe e kapi paniku pasi dëgjoi se koronavirusi ishte shpërndarë nga lakuriqët.
Pasi hoteli ku ai qëndronte u mbyll nga qeveria kineze, Siao shkoi në shtëpinë e një mikeshe. Kur të dy kishin temperaturë, ata u shtruan në spitalin më të afërt.
27 vjeçari iu nënshtrua një terapie intravenoze, mori ilaçe kundra virusit dhe më 4 shkurt, u konfirmua se ai kishte koronavirus. “Nuk jam pastruar për 20 ditë, nuk kisha peshqir, kurse në ushqim ndjeja aromën e përbërësve që dezinfektonin gjithçka”, ka thënë ai.
“Njerëzit flisnin se jam bërë mutant, se kam vdekur dhe se kam ardhur me qëllim në qytet për të infektuar të tjerë… Kam qenë mendërisht dobët”, ka thënë ky i ri nga Kina. Por pas disa ditësh në karantinë, ai mori lajmin se ishte kuruar.
