Qytetarët që kërkojnë të rivlerësojnë shtëpitë e privatizuara para vitit 1990 me taksën e re 2 për qind, do ta bëjnë atë me një çmim fiskal dysheme që është përcaktuar nga qeveria. Duke qenë se apartamentet e ndërtuara para viteve 1990 u privatizuan gjatë viteve 1992 deri në 1995 me çmime simbolike nga 12 mijë lekë deri në 30 mijë lekë, qeveria për to ka përcaktuar çmimin fiskal të 1995 -s, që llogaritet më minimali ndër vite.
Gazeta zbardh çmimet fiskale për shtëpitë e privatizuara për 31 qytete për të llogaritur tatimin nga diferenca e çmimit fiskal të blerjes dhe çmimit aktual fiskal.
Sipas tabelës, të gjithë qytetarët mund të bëjnë llogaritë se sa do të paguajnë nga rivlerësimi.
Si vlerë minimale fiskale për blerjen e shtëpisë do të merret kostoja mesatare për metra katrorë e sipërfaqes së shfrytëzueshme të përcaktuar nga Enti Kombëtar i Banesave.
Për Tiranën çmimi minimal fiskal i blerjes për të gjitha apartamentet e ndërtuara para 1990 të privatizuara, por që pronari nuk e ka shitur asnjëherë apo dhuruar me akt trashëgimie, si çmim blerjeje do të jetë vlera 16,664 lekë për metër katror. Në rast të rivlerësimit të shtëpisë, vlera e sotme e apartamentit do të llogaritet sipas çmimeve minimale fiskale të ndara në zona 32 zona për kryeqytetin. Pra në Tiranë, për të gjithë pronarët e shtëpive që kanë privatizuar apartamentet gjatë viteve 19921995, çmimi i blerjes do t’u llogaritet në vlerën 16.664 lekë/m². Ndërsa çmimi aktual do të llogaritet sipas çmimeve fiskale të ndara në 11 zona kadastrale. Mbi diferencën e çmimit të sotëm të shtëpisë dhe atij të mëparshëm do të llogaritet taksa 2 për qind që ai do të paguajë për rivlerësimin. E njëjta logjikë do të ndiqet edhe për qytetet e tjera. Në rast se një qytetar kërkon të rivlerësojë një shtëpi në Durrës si çmim i mëparshëm do t’i llogaritet me vlerën 17,483 lekë për metër katror. Për çmimin aktual të shtëpisë do t’i llogaritet vlera 39,185 lekë për metër katror. Tatimi 2 për qind do të paguhet për diferencën e çmimit të shtëpisë së llogaritur nga çmimet fiskale aktuale dhe çmimet fiskale të mëparshme. Panorama
