Sekretari i Përgjithshëm i Partisë Demokratike Gazment Bardhi, u shpreh sot se një kryetar i një bashkie të rëndësishme është dënuar në një nga vendet e BE-së për vrasje. Bardhi nuk preferoi ta zbulojë emrin e tij por tha se po pret të marrë vendimin e gjykatës.
“Në një rast një person është i dyshuar se në një nga vendet e BE-së është i dënuar për vrasje, sikundër ka edhe disa raste kur dyshohen për trafik droge.
Nëse është i dënuar, sigurisht që e ka vërtetuar gjykata, ajo që pres unë është që të marr dokumentacionin e gjykatës, nëse rezulton që është i dënuar sigurisht që e ka kryer atë krim.
Është bashki e rëndësishme, nuk mund të jap më shumë informacione, sigurisht që është njeri publik, pavarësisht se është emëruar nga Edi Rama”, tha Bardhi.
Sekretari i Përgjithshëm i PD-së theksoi se janë në proces verifikimi edhe 12 kryebashkiakë të tjerë.
“Kemi në proces rishikimi disa nga kandidatët e Edi Ramës. Jemi duke pritur dokumentacionet që vërtetojnë krimet që ata kanë kryer.
Nuk është detyra jonë të verifikojmë që x kandidat ose kryetar i pranishëm, ka qenë i dënuar dhe ka gënjyer në formularët e dekriminalizimit.
Çdo person me rekorde kriminale është zbuluar nga hetimet dhe verifikimet e kryera nga hetimet tona.
12 socialistë kemi aktualisht në proces verifikimi. Sapo marrim dhe provojmë me dokumentacion se të dhënat që kemi siguruar rezultojnë të vërteta, i publikojmë”, u shpreh ai në emisionin “Mbrëmje në Abc”.
