Këtë sezon lufta për titullin kampion në Itali, është plotësisht e hapur. Në garë janë 3 ekipe ndërsa diferenca më e madhe mes tyre është vetëm tre pikë.
Pas fitores së Lacios ndaj Interit, presidenti i Lacios Claudio Lotito, ka deklaruar se të gjithë ata që nuk mbështesin Juventusin apo Interin po shpresojnë se Lacio këtë vit të fitojë titullin kampion, si dhe nuk ka mohuar faktin se atmosfera në klub është e shkëlqyer.
“Mora shumë urime pas fitores kundër Interit, shumë nga këto urime ishin nga persona të cilët nuk ishin fansa të Lacios. E vërteta është se të gjithë po na kërkojnë t’i japim fund hegjimonisë së Juventusit si dhe të mundim Interin në garën për titullin kampion. Të gjithë ata që nuk mbështesin Interin dhe Juventusin, janë kthyer në krahun tonë”.
Duke folur për atmosferën pasi mundën zikaltërit, 62-vjeçari shtoi: “Kënaqësia më e madhe e ndeshjes të dielën nuk ishin mesazhet dhe telefonatat, por atëherë kur iu drejtova dhomave të zhveshjeve pas ndeshjes. Futem brenda dhe shikoj 5-6 lojtarë që mu afruan duke më përqafuar. Emocione dhe atmosferë e papërsëritshme”.
