Kompeticioni më i lartë i futbollit për klube në botë, Champions League, rikthehet mbrëmjen e sotme.
Gjithçka starton në orën 21:00, me dy ndeshje tepër të forta. Atletico Madrid-Liverpool është njëra prej përballjeve. Trajneri Diego Simeone nuk ka të gatshëm për këtë përballje yllin e skuadrës, Joao Felix, por me grupin që ka në dispozicion dhe mbështetjen e publikut, do mundohet ta kalojë me sukses këtë përballje.
“The Reds” vijnë në këtë ndeshje pas një fitoreje të vuajtur me Norwich në kampionat. Skuadra e Klopp do tentojë të mbrojë kurorën e Champions dhe në Madrid shkon me objektivin e qartë për të fituar.
Në ndeshjen tjetër, Thomas Tuchel do të sfidojë Borussia Dortmund në shtëpi dhe PSG do të ketë në fushë edhe Neymar, i cili është rikuperuar nga dëmtimi. Francezët janë në kërkim të një suksesi në arenën ndërkombëtare dhe kalimi i verdhezinjve shikohet si detyrim.
Gjithsesi Dortmund ka treguar gjithmonë që është një kockë e fortë për këdo. Të përforcuar me Haaland, si dhe me Hakim e Sancho në një formë shumë të mirë, PSG duhet të ketë kujdes nga kundërzbritjet e shpejta të gjermanëve.
Mungesat më të mëdha i kanë verdhezinjtë, të cilët do të duhet të bëjnë pa Julian Brandt dhe Marco Reus ndërsa nga ana tjetër PSG-ja do të ketë të gjithë titullarët në dispozicion, si rrallë herë në këto vitet e fundit.
