“Qëllimi i Ramës ishte eliminimi i Gjykatës Kushtetuese dhe sot nuk ka asnjë pengesë për të bërë këto akte normative.”
Kështu deklaroi avokati Indrit Sefa në Shijak TV teksa po komentonte ndryshimet që do të bëjë qeveria në ligjin për Policinë e Shtetit, Kodin Penal, Kodin e Procedurës Penale, ligjin Anti-mafia dhe ligjin me menaxhimin e pasurive të sekuestruara dhe konfiskuara, ku në një prej tyre lejohet që çdo drejtor vendor policie të përgjojë të dyshuarit e tij deri në 6 muaj, pa qenë nevoja të marrë leje nga prokurori apo gjykatësi.
Ai tha se të gjitha këto janë në kundërshtim të hapur me gjithë Konventën Europiane të të Drejtave të Njeriut si dhe me të gjithë strukturën penale, legjislacionin penal shqiptar duke filluar nga Kodi i Procedurës Penale, Kodi Penal dhe në vazhdim.
“Këto nuk janë ligje por thjesht dëshira personale të drejtuesve të PS të cilat hidhen në letër dhe me atë Parlament me 122 personazhe komikë thjesht ngrenë dorën dhe votojnë pa e kuptuar, pa e lexuar dhe pa e interpretuar asnjë gje mjafton që të jetë vullneti i kryeministrit, pastaj çdo gjë tjetër është e kalueshme.
Deklaratat të tipit jemi konsultuar me BE-në janë thjesht deklaratë për konsum publik të përditshëm që njerëzit ta interpretojnë sikur ka një vullnet të hekurt nga Bashkimi Europian dhe nga kryeministri për të luftuar krimin. Po të shikojmë dhe vetë përmbajtjen e ligjeve dhe vetë mënyrën sesi ato interpretohen dhe nga kryeministri dhe nga të gjithë zërat e mazhorancës duken qartë që janë në kundërshtim të hapur me gjithë Konventën Europiane të të Drejtave të Njeriut si dhe me të gjithë strukturën penale, legjislacionin penal shqiptar duke filluar nga Kodi i Procedurës Penale, Kodi Penal dhe në vazhdim. Është në shkelje të hapur të ligjeve themelore dhe mënyrës së organizmit te legjislacionit penal në Shqipëri. Fakti i mungesës së Gjykatës Kushtetuese është politik e mazhorancës e angazhuar për të arritur deri në këtë pikë, mungesa e saj nuk është thjesht rastësore por është qëllimi në vetvete i keësaj mazhorance dhe këtë qëllim e formalizon me këto ligje.
Më në fund doli e vërteta se Reforma në Drejtësi ka mangësitë e saj. Shoqata e gjyqatrëve ka bërë disa kundërshtime në Gjykatë Kushtetuese për ligjin për gjyqtarët dhe prokurorët në Republikën e Shqipërisë dhe u bënë disa ndryshime dhe u bënë disa amendamente të propozimeve fillestare të Reformës në Drejtësi dhe u shfuqizuan si anti-Kushtetuese. Rama eleminoi Gjykatën Kushtetuese dhe ato amendamente që kishte atëhere në mendje po i bën tani me akte normative. Pra ky ishte qëllimi i Ramës, eleminimi i Gjykatës Kushtetuese dhe sot nuk ka asnjë pengesë për të bërë këto akte normative” tha Sefa.
