Kryeministri i Kosovës, Albin Kurti do të takohet në muajin mars me presidentin e Serbisë, Aleksandër Vuçiç në Berlin dhe Bruksel. Ky do të jetë takimi i parë mes Kosovës dhe Serbisë pas vendosjes së taksës.
Lajmin e ka konfirmuar vetë nënkryetari i LDK-së, Lutfi Haziri, në kuadër të përgatitjeve për samitin e Zagrebit.
“Ta shohim që takimet e marsit që Kosova dhe Serbia i kanë në Berlin dhe në Bruksel a do të arrijnë të përgatiten për samitin e Zagrebit, në mars do të jetë vizita që është planifiku për Kosovën dhe Serbinë në Berlin dhe Bruksel. Samiti i Sofjes nuk e dha efektin e vet, tash po përgatitet Samiti i Zagrebit në maj, nuk ka ndodhë që BE’ja me i ba dy samite brenda tre vitesh, sepse Selaniku dhe Sofja i kanë 15 vite ndërmjet, kurse Sofja dhe Zagrebi janë shumë afër, por prapë vështirësitë që po dalin nga presidentja kroate janë se Schengeni Ballkanik është problemi kryesor”, – tha Haziri në RTV Dukagjini.
Ndërkohë, ditën e djeshme kryeministri Albin Kurti është takuar me kryeministrin shqiptar Edi Rama, në një klimë disi të tensionuar në deklarata mes tyre në konferencë shtypi.
