Alketa Vejsiu, e ftuar në “Opinion” mbrëmjen e djeshme, ka folur edhe për sulmet e revistës së saj ndaj Xhemi Shehut dhe motrave Vjollca, pasi këto të fundit e kishin ironizuar për paraqitjen dhe ndërrimin e shumë fustaneve gjatë drejtimit të Festivalit të RTSH-së.
Shkrimet ironizuese dhe tallëse kundrejt Xhemi Shehut dhe udhëtimet e motrave Vjollca në Dubai, bënë që të shpërthenin kritika të forta ndaj Alketës, e nuk munguan as fyerjet, ndersa në një moment, autorësinë e shkrimeve e pretendoi një vajzë me emrin Xhesi që menaxhonte faqen e Instagramit të revistës.
Alketa e bëri të qartë se vajzat e saj janë të lira në shkrimet e tyre në redaksi, ndërsa shtoi se askush nuk mendoi në atë moment sesi do të ndihej ajo vetë, kur të gjithë po e sulmonin.
“Unë jam një vajzë e ndjeshme pavarësisht se dukem si e fortë, punëtore, por pas ekranit të telefonit ndonjëherë rrëshket ndonjë pikë lot, mërzitem.
Ishte një luftë, një dorë jo e ashpër, po shumë e ashpër, dhe ishte e padrejtë sepse në këtë vend nuk mund të pushkatosh, nuk zgjidhet kjo gjë duke futur ingranazhin e së keqes në lëvizje. Është një deformim social i tmerrshëm, duhet të zbutet diskursi publik, duhet të ketë kritika konstruktive.
Unë ju hap rrugën të gjithë atyre që japin argumenta. Por kur ka ligësi dhe padrejtësi unë nuk ju hap rrugë, jam këtu për të mos ju hapur rrugë, për të thënë të vërtetën time”, tha ajo.”
Blendi Fevziu ndërhyri duke thënë se “nuk mund t’jua kthesh në të njëjtën mënyrë“.
“Unë nuk jua kam kthyer në të njëjtën mënyrë. Kam gazetare në redaksinë time, të cilat më kërkuan të jenë të lira, e lashë të lirë, patjetër që diçka mund të ishte kursyer, ishte ironi. Askush nuk mendoi për mua ‘e bulizuam apo nuk e bulizuam Alketën’! Nuk e di pse për mua nuk e bëjnë këtë llogari“– tha Alketa në studion e Opinion.
