Nga Boldnews.al
Kryeministri Edi Rama e priti me ceremoni zyrtare kreun e ri të qeverisë së Kosovës Albin Kurti, por pas ceremonisë ishte ligësia dhe cinizmi. Në rreshtin e “listë-pritjes” protokollare, i pari ishte Gent Cakaj, zëvendësministri i Jashtëm me atribute ministri (kur i teket kryeministriat tia japë këtë të drejtë), dhe më pas edhe Besa Shahini, Ministre e Arsimit.
Që të dy vijnë nga Kosova, ku i pari është një prurje e një figure kontroverse fort të errët si Baton Haxhiu, ndërsa ministrja Shahini është bashkëshortja e Dardan Mulliqajt ish-deputet i Vetëvendosjes, sot pjesë e partisë kundërshtare të PSD.
Nuk ishte rastësi përzgjedhja e tyre, pasi në rresht nuk kishte ministër tjetër përveç të përhershmes Elisa Spiropali, që shërbën si “xhol” i Ramës (futet kudo) dhe e merr me vete thuajse ngado që shkon. Edhe për të “pasionuarit” pas protokollit mund të konsiderohet si rutinë zyrtare pritja nga ministri i jashtëm, po Ministja e Arsimit çfarë donte aty, pa asnjë atribut diplomatik?
Këto janë lojërat e ulëta, të pista dhe fort malinje të një kryeministri i cili dukshëm ka hapur luftë me elitën e politikës kosovare, por edhe me qytetarët atje të cilët janë gati ta shpallin “non grata”, pas afrimit të Ramës me Serbinë dhe mbi të gjitha që njihet si nismëtari i dy ideve siç ishte çështja e “shkëmbimit të territoreve” Kosovë-Serbi, por edhe nisma e Minishengenit Ballkanik, i cili synon lëvizjen e lirë të njerëzve dhe mallrave, ku nga të gjithë ekspertët ekonomik dhe politik konstatohet me të drejtë se i jep një superfuqi serbisë në të gjithë rajonin, sidomos në aspektin ekonomik.
Po sot Rama zgjodhi “personin e gabuar” për ti bërë këtë lojë fëminore, duke i nxjerrë në ballë të parë kryeministrit të Kosvës Albin Kurti dy ministrat Cakajn dhe Shahini, të cilët nga Prishtina zyrtare shihen thjesht si të përkedhelur të Ramës, por jo përfaqësues të denjë të tyre. Gjithashtu Kurti ka qenë fort kritik në të kaluarën ndaj tyre, veçanërisht ndaj “liderit të madh” 28-vjeçarit Gent Cakaj.
Kjo lidhet me qëndrimet e tij të mëparshme, kur ishte një nga personat të cilët në mënyrë indirekte, por edhe si kanakar i Baton Haxhiut, përkrahte idenë e “shkëmbimit të territoreve” Serbi-Kosovë, ky synohej që Serbia të merrte zonën e lakmueshme Mitrovicën e Veriut, ndërsa Kosova të përfitonte një pjesë të Luginës së Preshevës.
Ky projekt ra që në Samitin e Berlinit një vit më parë, por Rama e mbajti zjarrin ndezur duke i hedhur “benzinë Beogradi”, që në fakt djeg kudo si Kosvën ashtu edhe Shqipërinë. Pasi është në konflikt të ashpër me ish-kryeministrin Ramush Haradinaj, tashmë Rama po tenton që të mposhtë Albin Kurtin, për ti imponuar Kosovës nisma të rrezikshme, që në fund do kenë pasoja për të dyja vendet shqiptare.
Në konferencën e parë të përbashkët Kurti u tregua i kujdeshëm në qëndrime, por mesazhet i la aty, ku deklaroi se para se të flitet të “Minishengen Ballkanik” të mendohet për “makro-shqiptarinë”. Këto nuk janë deklarata të një deliranti atdhetar folklorik, por kreut të ri të qeverisë së Kosovës, i cili pas 23 vitesh në një opozitë të fortë dhe parimore ka marrë besimin e qytetarëve të Kosovës. Gjithashtu shihet si përçuesi i një fryme i cili rrëzoi jo vetëm establishmentin politik prej dy dekadash në Kosvë, por po i jep një tjetër frymë edhe politikës në Shqipëri, ku jo rastësisht është hapur prej disa muajsh edhe zyra e Lëvizjes Vetëvendosja në Tiranë.
