Ai u ble si kampion te bote nga Manchester United, por dështoi. Po, një legjendë e futbollit gjerman si Bastian Schweinsteiger “ra” në ishull, aty ku luhet kampionati më i fortë në botë. Sot “Tigri” po vuan në “Old Trafford”, pasi tekniku Jose Mourinho nuk e lejon të luajë me skuadrën e parë, kështu që ish-kapiteni i Gjermanisë është i detyruar të stërvitet me të rinjtë. Ish-lojtari i Manchester Unitedit, Gordon McQueen, thotë se klubi dështoi duke blerë një lojtar në ditët e tij të fundit si profesionist dhe këtë po e vuan pikërisht “The Special One”.
Schweinsteiger paguhet 140 mijë paundë në javë dhe pikërisht kjo “u djeg” drejtuesve të klubit anglez. Njeriu i cili ka luajtur mbi 200 ndeshje me “Djajtë e kuq” u shpreh për sajtin “Goal” se dështimi i Schweinsteigerit pritej. “Ishte e qartë që para se të transferohej në Manchester, se ai nuk i kishte më këmbët për lojë. Nuk mendoj se United transferoi një lojtar të klasit botëror. Nëse sheh statistikat e tij në dy sezonet e fundit, e kupton se nuk i kishte të mira. E di se ai fitoi Botërorin me Gjermaninë në 2014-n, por performancat e tij me klubin ishin shumë të dobëta dhe të pakta. Ishte një veprim i gabuar nga Louis van Gaal. Transferimet e tij ishin një katastrofë. Në këtë rast, është pasuesi i tij ai i cili po përballet me këtë, por është paksa rrëmujë”, – analizoi McQueen.
Bastian Schweinsteiger dha dorëheqjen nga kombëtarja gjermane pas Kampionatit Evropian 2016 Schweinsteiger, i cili u martua me tenisten serbe Ana Ivanovic këtë verë, fitoi tetë tituj kampionë me Bayernin, madje edhe Ligën e Kampionëve, por McQueen thekson se klubi bavarez e dinte se nuk po shisnin një nga lojtarët e tyre më të mirë. “Bayerni nuk do t’i shiste një lojtar klasi një rivali si Manchester United. Ata e lejuan të ikte, sepse ditët e tij më të mira kishin kaluar dhe donin të ecnin përpara”, – tha ai.
Tekniku Jose Mourinho është shprehur se gjermani nuk ka shans për të luajtur te Manchester United Mesfushori së fundmi ka theksuar se “Djajtë e kuq” do të jenë skuadra e tij e fundit në Evropë, duke lënë të kuptojë se destinacioni i tij i ardhshëm do të jetë Kina ose SHBA-ja, por McQueen ka një mendim pse gjermani është shprehur ashtu. “Ai e di se nuk do të ketë rrogë kaq të lartë në ndonjë skuadër tjetër në Evropë. Ai ka ardhur këtu për një arsye dhe ajo arsye janë vetëm paratë. Ai fiton këtu më shumë se te Bayerni. Schweinsteiger do t’ia bëjë jetën të vështirë deri sa të mundet Unitedit. Klubi do të detyrohet të paguajë për kohëzgjatjen e kontratës së tij. Çfarëdo që të ndodhë tani për të, reputacioni i tij në Gjermani do të mbesë i madh, por jo në Manchester“, – përfundoi 64-vjeçari.
