Cikloni Kiera (Ciara), e cila ka përfshirë Mbretërinë e Bashkuar, me erëra të forta dhe shira të dendura, që kanë shkaktuar probleme në transport, nuk do të prekë Shqipërinë.
Kështu shprehet sinoptikania e SHMU-së, sipas të cilës ky ciklon mund të sjellë një përkeqësim të motit, por nuk e prek Shqipërinë.
Në shumë zona në Britaninë e Madhe, ckloni ka shkaktuar përmbytje dhe autoritetet kanë dhënë alarmin “rrezik për jetën” në lokalitetet Patelej Brixh dhe Jorkshajër.
Linjat ajrore kanë anuluar shumë fluturime, ndërsa kompanitë që menaxhojnë hekurudhat u kanë bërë thirrje njerëzve që të shmangin udhëtimet.
Pasagjerët e trageteve janë përballur gjithashtu me vonesa dhe anulime, ndërsa drejtuesve të automjeteve u është bërë thirrje për kujdes maksimal.
Një paralajmërim për erëra të forta është në fuqi në disa zona të Britanisë së Madhe, ku erërat e deritanishme kanë arritur deri në 129 km në orë.
Aeroporti i Hithrout ka bërë me dije se ka marrë masa me partnerët e linjave ajrore për të operuar me shërbim të kufizuar dhe të njëjtën gjë kanë bërë edhe aeroporte të tjera.
