Nga Boldnews.al
Mandati i Yuri Kim në Tiranë rikthen interesin amerikan në tregun energjitik, krahas prioriteteve tashmë të njohura të diplomacisë së Uashingtonit për Shqipërinë, Reformën në Drejtësi dhe fuqizimin e rolit të NATO-s.
Në seancën dëgjimore para Senatit Amerikan, para emërimit të saj në vendin tonë, zonja Kim identifikoi konsolidimin e raporteve ekonomike SHBA-Shqipëri si një prej “key-priority” të aktivitetit të saj në Tiranë.
Këtë element, ambasadorja amerikane e riktheksoi në një aktivitet të zhvilluar pak ditë më parë, me Departamentin e Energjisë.
Diplomatja nga Uashingtoni deklaroi gjatë këtij aktiviteti se “Vitin e shkuar, përpara Senatit të SHBA, diskutova mbi prioritetet e mia nëse do të merrja konfirmimin si Ambasadore në Tiranë. Theksova rëndësinë që ka përkrahja dhe forcimi i lidhjeve ekonomike ndërmjet Shteteve të Bashkuara dhe Shqipërisë, si edhe punën që duhet bërë për të ndihmuar në sigurimin e mundësive të rritura ekonomike për bizneset amerikane dhe ato shqiptare”.
Sipas ambasadores Yuri Kim, “Shtetet e Bashkuara dhe Shqipëria kanë lidhje të forta miqësie dhe angazhimi, ndaj unë besoj se ne mund t’i dyfishojmë përpjekjet tona për të përmirësuar dhe forcuar lidhjen tonë ekonomike”.
Deklaratat e Ambasadores janë paraprirë nga takime të rëndësishme, të zhvilluar mes zyrtarëve shqiptarë dhe amerikanë, sidomos në sektorin strategjik të energjitikës.
Ministrja përgjegjëse shqiptare për Energjitikën, Belinda Balluku, është ftuar në një seri takimesh nga zyrtarë të rëndësishëm në Uashington, lëvizje që dëshmojnë për një interes të shtuar amerikan për raportet me Shqipërinë në këtë drejtim.
Në Shtator 2019, ministrja Balluku ishte e ftuara e Asistent-Sekretarit Amerikan, Francis Fanon, në Nju Jork, ku u diskutua për sigurimin e kushteve për forcimin e raporteve dy-palëshe në sektorin e Energjisë.
Takimi me Fanon u pasua nga biseda teknike me zyrtarë të tjerë të Departamentit të Energjisë në Shtetet e Bashkuara të Amerikës, të cilat u finalizuan në mesjavën që sapo lamë pas, me prezantimin e nismës dypalëshe, në një aktivitet të organizuar nga ministrja Balluku dhe asistent-sekretari i Departamentit Amerikan të Energjisë, z. Steven Winberg.
Iniciativa e prezantuar në Tiranë, përbën një risi jo thjesht për Shqipërinë, por ndihmon edhe për faktorizimin e vendit tonë në tregun rajonal të Energjisë.
Seria e takimeve për lancimin e iniciativës SHBA-Shqipëri në sektorin energjitik u përmbyll me një takim ndërmjet Sekretarit Amerikan të Energjisë, z. Dan Brouillete dhe ministres shqiptare, Balluku, këtë fundjavë, në Uashington.
Shpejtësia dhe, sidomos shpeshtësia e takimeve gjatë këtyre muajve të fundit, mes drejtuesve qeveritarë të Energjitikës në Shqipëri dhe SHBA është një dëshmi e fortë se autoritetet e Uashingtonin po dëshmojnë një interes të shtuar për sektorin energjitik në vendin tonë, duke vendosur pikërisht këtë degë të ekonomisë në bazën e raporteve ndërmjet dy vendeve.
Një interes, i cili, sipas deklaratave të zyrtarëve të Uashingtonit, pritet të përkthehet në rritjen e numrit të investitorëve amerikanë dhe shtim të raporteve dy-palëshe, sigurisht, në interes dhe avantazh të shtuar për ekonominë shqiptare.
