Një 47-vjeçar, i shumëkërkuar në Greqi për disa vepra penale, u arrestua nga policia e Vlorës.
Burime zyrtare bëjnë të ditur arrestimin e shtetasit Bardhosh Mino (Lytaj), 47 vjeç, mbi të cilin rëndojnë akuzat nga vrasje me dashje në trafik droge, të parashikuara sipas kodit Penal të shtetit Grek.
Policia bëri të ditur se ka finalizuar operacionin “Bianco” mbi bazën e të cilit është bërë kapja dhe ndalimi i shtetasit në kërkim Bardhosh Mino (Lytaj).
Ky shtetas ishte shpallur në kërkim në Shtator të vitit 2019, pasi Prokuroria Vlorë ka dërguar urdhërin për ekzekutimin e vendimit penal nr.196, datë 06.08.2019 të Gjykatës së Rrethit Gjyqësor Vlorë, mbështetur edhe nga të dhënat e dërguara nga shteti Grek, ka vendosur masën e sigurisë “Arrest në burg” për veprat penale: “Vrasje me dashje, kryer në bashkëpunim”, “Grabitje në bashkëpunim”, “Armëmbajtje pa leje”, “Përdorim i paligjshëm i armës”, “Zotërim dhe transportim i një sasie të madhe të lëndëve narkotike”, dhe “Falsifikim”, të parashikuara sipas kodit Penal të shtetit Grek.
Në vitin 1998 në territorin grek, Mino u akuzua se grabiti dhe dhunoi dhe vrau dy turiste anglez në afërsi të Patrës. Për këtë ngjarje Gjykata e Shkallës së Parë në Patra e shpalli fajtor dhe e dënoi atë me burgim të perjetshëm. Mbi Minon rëndon edhe akuza e trafikut të lëndeve narkotike, prodhim dhe shitja e lendeve narkotike për të cilën Gjykata e Kretës e ka dënuar me 6 vite burg. Ndaj tij rëndon edhe akuza e vjedhjes së energjise elektrike. Për këtë akuzë u dënua me 5 muaj burg nga gjykata e Korfuzit.
Në dosjen e siguruar nga prokuroria, rezulton se Mino ka edhe nje arratisje nga një burg i Greqisë në kohën kur vuante dëninin për vrasjen e turistëve.
