Detaje të reja janë zbardhur nga vdekja e Andon (Erjon) Mëhillajt, anëtar i grupit të Julian Sinanajt, i cili u gjet i pajetë në qelitë e burgut të Peqinit në rrethana ende të paqarta.
Burime bëjnë me dije se kishte dy ditë që kishte qenë keq nga ana shëndetësore dhe kishte kërkuar ndihmë mjekësore. Por, burgu i Peqinit nuk kishte doktor të specializuar për sëmundjen e tij. Ata nuk e kanë çuar në një spital jashtë burgut pasi duhen procedura dhe kishin marrë frikë së fundmi nga rasti i Dritan Dajtit.
Andon (Erjon) Mëhillaj vuante prej kohësh nga depresioni, madje merrte edhe disa ilaçe për këtë arsye.
Mbrëmjen e djeshme të gjithë të burgosurit kanë protestuar duke goditur fort dyert e burgut.
Ndërkohë dhe familjarët e Mëhillajt kanë ngritur akuza ndaj drejtuesve të burgut të Peqinit
“Drejtësi për Erjonin. Morën në qafë një familje. Burgosën të pafajshmin dhe lanë jashtë kriminelët e vërtetë. Erjoni është dhunuar aq sa filloi të kishte probleme me zemrën. Na thanë që djali ka kaluar në depresion. Erjonit nuk i kanë dhënë ndihmë mjekësore, e kanë lënë të vdesë.” – janë shprehur familjarët e Mëhillajt për mediat
Pritet ekspertiza për të përcaktuar shkakun e vdekjes së tij.
Ndërkohë, Panorama jep një pistë tjetër se kemi të bëjmë me një vetëvrasje.
Në 2014 ai u vetëdorëzua në policinë e Vlorës, pasi ishte shpallur në kërkim si pjesë e kësaj bande famëkeqë, pas të cilës fshihen disa vrasje dhe jo vetëm.
Mëhillaj u akuzua se ishte sekseri që ndërmjetësonte ‘pazaret’ mes biznesmenëve dhe Julian Sinanajt, duke bërë rolin e negociatatorit. Po ashtu pjesë e bandës ishte dhe kushëriri i tij, Genis Mëhillaj, i cili figuronte në faqen e Interpolit si person në kërkim për “Akte terroriste” dhe “Financim të terrorizmit”.
Gjendet i vdekur në qelinë e burgut Andon Mëhillaj, anëtari i bandës së Julian Sinanajt
