Qeveria italiane ka shpallur të shtunën Ditë Zie kombëtare për viktimat e tërmetit në pjesën qendrore të vendit. Si pasojë e tërmetit, deri tani raportohen të kenë vdekur 281 persona, ndërsa numri i të plagosurve është rreth 400.
Që prej dy ditësh vijojnë gërmimet për gjetjen e të mbijetuarve, ne Arquatan, Acumoli, dhe Amatrice, ku nxirren trupat e pajetë, ndërsa shpresat shuhen pak nga pak për të gjetur të tjerë të mbijetuar nën rrënoja.
Nuk është e lehtë të gërmosh kur toka dridhet ende nga tërmeti që nuk kanë të mbaruar, pasi edhe gjatë natës ka pasur 40 lëkundje me magnitude 4.2 ballë.
Forcat e kërkim-shpëtimit vijuan dhe gjatë natës kërkimet mes rrënojave me pishtarë në duar, ashtu si dje. Lotë, britma gëzimi sapo dikush nxirret i gjallë nga rrënojat, siç ishet rasti i 10-vjeçares që u gjet pas 17 orësh kërkim. Familjarë rrethojnë ndërtesat e shembura në pritje të një lajmi të mirë për të afërmin e zhdukur. Kjo është drama që ka ‘mbërthyer’ prej dy ditësh zonat e prekura nga tërmeti në Italinë Qendrore, por edhe mbarë vendin.
QEVERIA ITALIANE AKORDON 50 MILIONE EURO PER DEMET NGA TERMETI
Rreth 50 milionë euro vendosi të akordojë qeveria italiane si fond emergjence për përballimin e dëmeve të shumta.
“Rindërtimi i zonave të shkatërruara është prioriteti ynë” u shpreh kryeministri italian. “Nuk mund te harrojme se kemi nje angazhim moral drejt qytetarëve të këtij vendit. Rindërtimi është prioriteti i qeverisë tonë. Ne jemi më të mirët në botë kur vjen çështja tek menaxhimi i emergjencave, por nevojitet që të mendojmë përtej gjendjes së emergjencës. Kemi nevoje për një plan më të madh parandalimi dhe këtë do ta bëjmë së bashku” deklaroi Renzi. Shërbimet e emergjencës janë të gjithë ne gadishmëri, të plagosurit janë përcjellë në spitale, ndërsa për të pastrehët janë ngritur cadra. Tërmeti 6.2 ballë i së mërkurës në mëngjes, i cili zgjati plot 20 sekonda, u ndje thuajse në gjithë Italinë nga Bolonja, në veri të Napolit në jug, dhe dhjetëra lëkundje të tjera pasuan goditjen e madhe. Ndërkohë në Amatrice gjatë natës së kaluar janë ndjerë të tjera lëkundje të forta tërmeti.
SHPALLET GJENDJA E EMERGJENCËS NË ITALI
Këshilli i Ministrave në Itali ka shpallur dje gjendjen e emergjencës pas tërmetit të një dite më parë. Kryeministri Matteo Renzi bëri të ditur se qeveria ka akorduar 50 milionë eurot e para për emergjencën e shkaktuar nga tërmeti, ndërsa siguroi se rindërtimi i zonave të shkatërruara është prioritet i të gjithë vendit. Qeveria po parashikon të përjashtojë nga taksat zonat e prekura nga tërmeti.
