Kryetari i Partisë Demokratike Lulzim Basha ka përshëndetur krijimin e qeverisë në Kosovë, duke e cilësuar akt ndershmërie dhe pjekurie politike, e një vizioni të qartë të drejtuesve të LVV dhe LDK.
“Në emrin tim e të Partisë Demokratike, përshëndes përzemërsisht LVV dhe simotrën tonë LDK për marrëveshjen e arritur.
Marrëveshja e sotme është një plotësim i vullnetit të qytetarëve të Kosovës. Ajo është një akt ndershmërie dhe pjekurie politike e një vizioni të qartë të drejtuesve të LVV dhe LDK. Kjo marrëveshje është përgjigje konkrete e vullnetit për ndryshim i qytetarëve të Kosovës.
Partia Demokratike si përgjatë çdo dite të historisë së saj, do të jetë plotësisht në krah e mbështetje të Kosovës dhe udhëheqësisë së saj, sot në opozitë e më fort nesër në qeverisjen e vendit, në sfidat që i kemi përpara dhe që kërkojnë angazhim të sinqertë e bashkëpunim vëllazeror”, thuhet në deklaratën e kreut demokrat.
Reagimi i Bashës ka ardhur pasi Lëvizja Vetëvendosje dhe Lidhja Demokratike e Kosovës nënshkruan sot marrëveshjen për bashkëqeverisje. Arritja e marrëveshjes u bë e ditur nga kryetari i Vetëvendosje, Albin Kurti dhe ai i LDK, Isa Mustafa.
Qeveria e re do të ketë 15 ministri dhe 33 zëvendësministra, ku LDK dhe VV do të drejtojnë nga 6 ministri secila, ndërsa 3 të tjera do të shkojnë për komunitetet.
Qeveria e re e Kosovës pritet të votohet ditën e hënë në seancën e thirrur nga i mandatuari për kryeministër Albin Kurti.
Ky i fundit në një konferencë të përbashkët me Isa Mustafën tha se “u takuam dhe dakorduam për të zgjedhur qeverinë e re dhe në këtë mënyrë të jetësojmë ndryshimin e madh politik të 6 tetorit”.
“E kemi nënshkruar marrëveshjen, jemi marrë vesh për të gjitha përveçse për harmonizimin e programit dhe ndarjen e përgjegjësive në kuadër të qeverisë së re ku do të bashkëqeverisim. Ju falenderoj të gjithëve për durimin dhe përkrahjen që keni treguar gjatë këtij procesi që nuk ka qenë i lehtë, por ka qenë shumë më i sigurt nga sa është menduar”, tha Kurti.
