Shqiptari i cili u gjet i pajetë në Belgjikë në Maj të vitit të kaluar është Festim Kalaj dhe vrasja e tij ka ndodhur në një plantacion droge. Të dhënat mësohen nga BoldNews, nga një letër-porosi e autoriteteve belge që i është dërguar më 18 Dhjetor Ministrisë së Drejtësisë.
Viktima
Lidhur me krimin, autoritete belge kanë nisur procedim penal për dy shqiptarë, me iniciale A.M. dhe E.H..
Më datë 20 Maj 2019, është gjetur trupi i një personi të panjohur në Ringvaart në Lievegem në lartësinë e urës Speybrug. Trupi ishte i mbështjellë në një thes të madh plastik. Përreth ishte vënë 3 herë rreth trupit një rrjetë për ndarje gardh, e lidhur bashkë me kabllo elektriciteti. Trupi ishte i lidhur me një transformator elektrik për t’ia shtuar peshën. Nga identifikimi në bazë të shenjave të gishtërinjve ka rezultuar se shtetasi është Festim Kalaj.
Nga aktet, rezulton se viktima dhe autorët e dyshuar janë përfshire në një plantacion droge në zonën “Zwalm” në Flanders. Hetimet e autoriteteve belge kanë zbuluar se Kalaj është qëlluar për vdekje në banesën në Zwalm. Lidhur me krimin, janë proceduar penalisht A.M. dhe E.H., për veprën penale të vrasjes.
Letër-porosia
Pas mbërritjes në Ministrinë e Drejtësisë, letër-porosia i është përcjellë Prokurorisë së Vlorës që ka kërkuar në gjykatë ekzekutimin e veprimeve hetimore që kërkohen në shkresë.
Gjykata pranoi kërkesën e prokurorisë dhe vendosi që të pyeten disa persona siç kërkohet në letër-porosinë e autoriteteve belge si dhe marrja e monstrave të ADN-së. Veprime këto që mund ti shërbejnë hetimeve të prokurorëve belg për zbardhjen e rrethanave të krimit.
/BoldNews/
