Familjarët e Jan Prengës bënë përpjekje në mënyrë private për të liruar të afërmin e tyre pa e ditur se fundi i tij kishte qenë tragjik vetëm pak orë pas rrëmbimit më 17 janar në mes të Kamzës.
Ata mësohet se kanë kontaktuar madje edhe pajtues gjaqesh të cilët hynë në negociata për të liruar pengun.
Përpara se policia të zbardhte skemën se kush fshihej pas rrëmbimit, familjarët e Jan Prengës e kishin “kyçur gojën” dhe nuk kishin dhënë asnjë informacion në polici për ndonjë problem që mund të kishte pasur i afërmi i tyre.
Sakaq, përgjimet me vëllain e Jan Prengës nga burgu në Angli zbardhën porosinë e tij për familjen: Mos tregoni asgjë në polici.
Edhe pse ende nuk është gjetur trupi i Jan Prengës, familja e tij ka hapur dyert e mortit, ndërkohë që i bëjnë apel shtetit ta gjejë trupin sa më parë dhe ta sjellë pranë familjes.
Familjarët e 48-vjeçarit janë lajmëruar nga Policia në lidhje me përfundimin e arritur gjatë hetimeve dhe dyshimeve se ai është vrarë nga pengmarrësit. Nga ana tjetër, në lidhje me personat e arrestuar, familjarët e Prengës kanë deklaruar se nuk i njohin, shkruan Panorama.
Kunati i tij, Mark Suli, burri i motrës së viktimës, në një prononcim për “News 24”, ka thënë se janë njoftuar nga Policia për fundin tragjik të familjarit të tyre. “Policia na thirri mbrëmë (të hënën) dhe na tha se ai nuk jeton më. Nuk i njohim të arrestuarit, as ne, as personi që është marrë peng, as ka pasur asnjë lloj llogarie me ta”, ka thënë më tej ai, duke i bere apel shtetit që të gjejë trupin e të afërmit që deklarohet se nuk jeton më.
“Shteti të gjejë trupin sa më shpejt dhe ta sjellë atë në shtëpi. Autorët të vihen para drejtësisë”, ka thënë kunati i Prengës, duke deklaruar se informacionin e kanë marrë vetëm nga Policia.
