Pas 8 ditësh i zhdukur, është gjetur i pa jetë në Itali trupi i shqiptarit 58-vjeçar, Viktor Qosja, i cili u denoncua i zhdukur që prej datës 19 janar, ndërsa ishte nisur nga Venezia për të takuar të vëllain e tij që banonte në Viareggio.
Vajza e tij kishte denoncuar në policinë italiane zhdukjen e babait, i cili nuk kishte mbërritur tek vëllai i tij e as nuk ishte kthyer në banesë.
Mediat italiane informojnë se 58-vjeçari është gjetur i pa jetë në një kanal buzë binarëve hekurudhorë e rreth 1 km larg stacionit Pescia. Trupi është identifikuar dhe nga familjarët.
Dyshohet se 58-vjeçari ka zbritur gabimisht e në momentin që treni është nisur ka tentuar të hipë në të, gjë që i ka shkaktuar rrëzimin fatal.
Megjithatë kjo mbetet vetëm një hipotezë e përcjellë nga mediat italiane.
Prokuroria italiane ka hapur një proces hetimor për të zbardhur motivin e vdekjes. Gjithashtu priten rezultatet e autopsisë së trupit të viktimës.
