Porto është kualifikuar në fazën grupore të Ligës së Kampionëve duke eliminuar Romën. Ndeshja e parë e zhvilluar në Portugali përfundoi me rezultat 1-1, kurse takimi i kthimit në “Stadio Olimpico” përfundoi me rezultat 0-3, me portugezët që shkojnë më tej me rezultat të përgjithshëm 4-1.
Pas një harkimi të Otavinhos nga gjuajtja e lirë, Felipe realizoi me kokë (8’). Kujtojmë që i njëjti futbollist kishte shënuar autogol në përballjen e parë.
Gjatë pjesës së parë, skuadra vendase mbeti me një futbollist më pak në fushë. Kapiteni Daniele De Rossi bëri një ndërhyrje të rëndë ndaj Perez dhe arbitri e përjashtoi me të karton të kuq (39’).
Një tjetër futbollist i “giallorossëve” u përjashtua me të kuq në gjysmën e dytë. Emerson u largua për shkak të ndërhyrjes së gabuar (50’) duke e lënë skuadrën ta vazhdojë lojën me nëntë futbollistë.
Kjo bëri që miqtë ta kishin më të lehtë vazhdimin e ndeshjes duke shënuar edhe dy gola të tjerë.
Miguel Layun ishte futbollisti që arriti ta realizojë golin e dytë duke shënuar në portën e zbrazët (73’). Ndërkaq, Jesus Manuel Corona shënoi një gol shumë të bukur për ta vulosur triumfin (75’).
