Pazari i ri në sheshin “Avni Rustemi” në kryeqytet prej afro një viti është kthyer në kantier pune e njëkohësisht stërmundimi për banorët e zonës dhe ata që kanë nevojë ta përshkojnë zonën aktualisht të mbyllur pjesërisht.
Bashkia e Tiranës kishte shpallur rikonstruksion dhe disa risi në këtë zonë që njihet si Pazari i Ri. Financimi është bërë më së shumti nga Fondi Amerikan i Zhvillimit. Se kur do të marrin fund punimet kjo nuk dihet.
Megjithatë sot, bashkia njoftoi se një fazë e punimeve do të përfundojë në vjeshtë. Kjo presupozohet të kuptojë se punimet mund të përfundojnë midis fundit të shtatorit deri fundit të dhjetorit të vitit në vazhdim. Kryetari i Bashkisë së Tiranës, Erion Veliaj tha sot se ky projekt, më shumë se treg, krijon komunitet”.
“Pazari i ri” sipas tij, “shumë shpejt do të kthehet në një hapësirë që do shërbejë jo vetëm për tregti dhe biznes, por edhe si një zonë relaksi dhe turistike”. Projekti parashikon rehabilitimin total të sheshit “Avni Rustemi” dhe zonës së “Pazarit të Ri”, restaurimin e ndërtesave tradicionale të zonës, ndërtimin në të ambienteve të nevojshme moderne për tregtarët dhe e shoqëruar kjo me një hapësirë pedonale.
Projekti synon që ta kthejë një hapësirë multifunksionale, ku gjatë paradites të shërbejë si një treg për banorët e zonës dhe pasdite në një shëtitore dhe ambient relaksues, ku nuk do të mungojnë baret dhe restorantet që gatuajnë ushqim tradicional shqiptar, artizanë, duke u shndërruar kështu në një epiqendër të turizmit në Tiranë. Burime zyrtare nga bashkia e Tiranës thanë për noa.al se ky projekt do të realizohet në disa faza, pas kanalizimeve do vijohet me nënkalimin dhe më pas me fazat e tjera të ndërtimeve në sipërfaqe. Zbatimi i projektit ka nisur në muajin tetor dhe aktualisht po punohet me rrjetin e kanalizimeve, ndërsa ka nisur dhe ndërtimi i markatës së fruta-perimeve. Më pas puna do të vijojë me ndërtimin e markatës së mishit dhe të peshkut.
