Shkëndija reagon ashpër ndaj Federatës Maqedonase të Futbollit pas ngjarjeve të shëmtuara që ndodhën në sfidën që u zhvillua të Dielën në stadiumin Philipi 2 në Shkup mes Vardarit dhe skuadrës tetovare.
Klubi shqiptar me një komunikatë në faqen zyrtare ka shprehur indinjatën e thellë ndaj FFM, duke i kërkuar i kësaj të fundit të marrë masa dhe të ndalojë ofendimet dhe thirrjet raciste nëpër stadiumet e futbollit në Maqedoni pasi në kundërt skuadrat shqiptare që luajnë në këtë kampionat do të rishikojnë statusin e tyre. Në sfidën e vlefshme për javën e dytë të ligës së parë të futbollit maqedonas mes Vardarit dhe Shkëndijës që u fitua me rezultatin 3-0 nga skuadra kryeqytetase tifozët e Vardarit të Shkupit nisën të ofendonin në masë me koret e tyre raciste dhe thirrjet për genocid kundër shqiptarëve. Por sipas asaj që nënvizon klubi i Shkëndijës edhe pse ato ndodhën përpara syve të delegatit të ndeshjes Vasko Kantarxhiev ky fakt nuk pengoi këtë të fundit të lejonte vazhdimin e ndeshjes.
Edhepse situata në stadiumin Philipi 2 u bë shumë e rëndë delegati nga Strumica nuk e pa të arsyeshme të ndërpriste lojën qoftë edhe për pak caste dhe t’i jepte urdhër drejtuesve të Vardarit t’u bënin thirrje tifozëve të tyre të ndalonin koret raciste. Klubi i Shkëndijës i kërkon FFM, të marrë menjeherë masa pasi nëse vazhdohet të veprohet me standarte të dyfishta sic ndodhi në ndeshjen e të Dielës, skuadra tetovare mund të rishikojë pozicionin e saj në kampionatin maqedonas pasi ky është një rast i përsëritur. Përsa i përket ndeshjes duhet pranuar fakti që edhe pse zbritën në fushë ndaj Vardarit vëmendja e futbollistëve të Shkëndijës është te sfida e parë e fazës play-off të Europa League mes kuqezinjëve tetovarë dhe Gent që do të zhvillohet të Enjten në Belgjikë.
Për t’u përgatitur sa më mirë për këtë duel historik klubi i Shkëndijës pak ditë më parë i kërkoi FFM ta shtynte për një datë tjetër derbin e Maqedonisë mes Vardarit të Shkupit dhe skuadrës tetovare, por dicka e tillë nuk ndodhi pasi drejtuesit e klubit kryeqytetas nuk pranuan. Emocionet e ndeshjes së parë për play-offin e Europa League mes belgëve të Gent- Shkëndijës së Tetovës të gjithë shqiptarët do të kenë mundësi t’i përjetojnë live në ekranin e Supersport.
