Sizmiologu i njohur Rrapo Ormeni në një lidhje me emisionin ‘Opinion’ e cilësoi lëkundjen e sotme si normale dhe bëri thirrje që shqiptarët të heqin dorë nga aplikacionet.
Ormeni tha se tërmeti i sotëm nuk ka qenë me epiqendër në Vorë siç u raportua fillimisht, por ka qenë me epiqendër 10 kilometra në veri të Durrësit me thellësi 30 kilometra.
Sipas Ormenit goditjet po vijnë duke u ulur, ndërsa theksoi se edhe në ditët në vijim mund të ketë lëkundje të vogla, pasi pasgoditjet zgjasin, por nuk ka vend për panik.
‘Tërmeti i sotëm nuk ka qenë në Vorë, por 10 kilometra në veri të Durrësit, është në një thellësi 30 kilometra, dhe me magnitudë 4.3 të shkallës rihter. Ndjeshmëria lidhet dhe me zgjatshmërinë e tërmetit, e cila ishte më e madhe sot. Kjo magnitudë ishte në normalitet, nuk ka vend për alarm, pasi tërmete me këtë magnitudë po bien njëherë në 3-4 ditë që do të thotë se lëkundjet po bien. Që të qetësoheni nuk duhet të shohim aplikacionet por duhet të shohim IGJEUM’, deklaroi Ormeni.
