Jyrgen Klop është një nga personazhet më të njohura në botën e futbollit, por sërish u pengua që të hyjë në restorantin e hotelit të Liverpulit në Doha për të ngrënë mëngjes pasi nuk kishte me vete pasaportën. Trajneri i “Reds”-ave zbriti nga dhoma e tij me pjesën tjetër të skuadrës për të ngrënë mëngjes, por iu refuzua hyrja.
Ai i tregoi rojës së sigurisë mjetin e identifikimit të klubit, por kjo nuk ishte një provë e mjaftueshme. Tekniku gjerman e tregoi vetë me humor incidentin për mikrofonat e “BBC Sport”: “Ishte faji im, jo i tiji. Ne mendojmë se jemi në qendër të vëmendjes, por nuk jemi dhe kjo është një kujtesë se ka shumë vende në botë ku gjëra të tjera janë më të rëndësishme sesa kjo që bëjmë ne dhe ne luajmë futboll. Kjo është e gjitha”.
NDESHJA – Pasi preu biletën në finale, trajneri i Liverpulit vlerëson Alison Bekerin që mbajti në lojë skuadrën e tij. “Gjithçka të duhet është Alison Beker dhe vetëm Alison Beker. Ai ishte atje në momentet vendimtare. Ishte një ndeshje me të vërtetë e vështirë dhe pastaj hodhëm në fushë peshat e rënda. Gola të shkëlqyer, ndeshje e shkëlqyer, një superatmosferë. Nuk e dimë se çfarë ndodhi me Van Dajkun.
Mendonim se do të ishte në rregull. Tani do të shohim. Kemi marrë me vete disa fëmijë dhe mendojmë sesi të miksojmë një formacion të zgjuar. Tani duam të luajmë në finale dhe të shohim se çfarë mund të bëjmë”, përfundoi Klop. Ndaj Flamengos, “Reds”-at do të kenë shansin që ta fitojnë për herë të parë në historinë e tyre këtë kompeticion.
