Analisti Neritan Sejamini ka ironizuar qëndrimin e Prezencës së OSBE në Tiranë lidhur me ligjin e anti-shpifjes, që pritet të miratohet në seancën e nesërme në Kuvend.
Ndërkohë që ka një presion në rritje ndaj Kryeministrit Edi Rama për të mos kaluar paketën, Zyra e OSBE në Tiranë deklaroi se mbi draftin fillestar janë bërë përmirësime.
Qëndrimi i Zyrës së OSBE-së që drejtohet nga Ambasadori Bernd Borchardt, ka sjellë reagimin e analistit Sejamini.
“Për ata që po vrasin mendjen të kuptojnë qëndrimin e OSBE-së për ligjet ‘Rama’ kundër medias, një përkthim në gjuhën e thjeshtë shqipe i qëndrimit të OSBE-së është: Ne u përpoqëm dhe bëmë ca rregullime, kështu që ligji që po miratohet nuk është më i keqi fare.
Tani, në të vërtetë, ligji është prapë i keq, por ne premtojmë që do perpiqemi që aktet nënligjore (që i bën qeveria) të jenë të mira.
Po nuk qenë as ato të mira, ne do përpiqemi që AMA ta zbatojë ligjin e keq me dorë në zemer dhe të mos bëjë shumë dhunë ndaj mediave,” shkruan ai.
