Shpend Ahmeti deklaroi sot dorëheqjen nga posti i kryetarit të Partisë Social Demokrate, ndërsa në vend të tij është zgjedhur, Dardan Molliqaj.
Në garë për kreun e partisë ishin edhe kandidatë të tjerë të cilët ishin tërhequr.
Ahmeti përmes një postimi në rrjet deklaronte dorëheqjen, ndërsa merrte përgjegjësitë për rezultatet zhgënjyese të kësaj partie në zgjedhjet e 6 tetorit.
“Natyrisht se përgjegjësia më e madhe është e imja si kryetar i subjektit. Për të mos kërkuar përgjegjësi nga asnjëri individualisht, si kryetar i subjektit kam kërkuar mbledhjen e Kuvendit të PSD si organ më i lartë vendimmarrës në subjekt.
Meqenëse edhe Statuti i PSD kërkon mbajtjen e zgjedhjeve pas zgjedhjeve nacionale për Kuvendin e Kosovës, sot kam kërkuar nga Kuvendi i PSD mbajtjen e zgjedhjeve të jashtëzakonshme për të gjitha strukturat udhëheqëse të partisë duke filluar nga kryetari.
Kjo na mundëson që kolektivisht të reflektojmë dhe të marrim përgjegjësi si parti. Ky propozim u aprovua në mënyrë unanime dhe që nga sot PSD do të ketë kryetar të ri dhe Këshill të ri. Pastaj Këshilli do ta votojë kryesinë e re dhe pozitat tjera udhëheqëse në parti”, ka shkruar Ahmeti në rrjet.
