Franck Kessie deklaron që do të qëndrojë te Milani për shumë vite, në kohën që përflitet për një lëvizje të tijën në merkaton e janarit.
Mesfushori 22 vjeçar, u bashkua me Milanin në një marrëveshje të përhershme verën e kaluar, teksa ishte pjesë e klubit kuqezi prej dy viteve në huazim nga Atalanta.
Rivalët italianë Napoli, dhe dy skuadrat e Premier Ligës, West Ham dhe Wolves janë të interesuar për mesfushorin, por në një intervistë për “Sport Mediaset”, Kessie hedh poshtë zërat e merkatos duke deklaruar qëndrimin me Milanin.
“Nëse doja të largohesha, do ta kisha bërë me kohë. Dëshiroj të qëndroj këtu për shumë vite. Milani është skuadra që kam bërë tifo që fëmijë”.
“Për mua të luaj në San Siro me kuqezinjtë është një ëndërr e bërë realitet dhe gjithmonë do të jap më të mirën për këto ngjyra”.
Ndërsa në lidhje me sezonin negativ që po zhvillon skuadra, ai thotë:
“Kemi bërë disa gabime në fillim të kampionatit, por tani po rritemi si skuadër, po punojmë për të arritur objektivat tona”.
