Ish-ministri i Drejtësisë, Ylli Manjani e ka quajtur “lajthitje e rëndë në objekt e në ligj” akuzën e prokurorëve Kolë Hysenaj dhe Genc Qana për personat e marrë të pandehur lidhur me dosjen ‘Geron Xhafajn’.
“Asnjëri nga ata persona, që sot Prokuroria i ka akuzuar dhe në pretencën e saj ka kërkuar dënim, NUK BËRI KURRË NJË KALLËZIM në Prokurori. Pra të akuzosh për Kallëzim të Rremë, pa kallëzim fare quhet NONSENS juridik. Lajthitje e rëndë në objekt e në ligj”, shprehet ish-ministri në një reagim.
“Kjo është turp, jo akuzë”, vijon ai, ndërsa shton se shpreson “që Gjykata ta hedhë në kosh të plehrave këtë akuzë e bashkë me të të gjithë këtë praktike, të rrezikshme për drejtësinë”.
Prokuroria kërkoi sot dënimin me 3.6 vite burg për Albert Veliun, 3 vite për Fredi Alizotin, 3 vjet shërbim prove për ish-deputetin Ervin Salianji dhe dënimin gazetarit Jetmir Olldashi.
Reagimi i plotë i Manjanit
Në një shënim në FB, Manjani shkruan:
Nuk do ta besoja po të ma rrefente dikush konkluzionin krejt alogjik dhe pa asnjë mbështetje ligjore të Prokurorisë që akuzon njerëz për kallëzim të rremë, ndërkohë që nuk është bërë kallëzim fare!!!
Çmenduri juridike, që sigurisht lë shteg për hamendësime nga më të ndryshme.
Siç mund ta shihni në këtë foto, Kallëzimi i Rremë (neni 305) është mjë vepër penale në kapitullin e Veprave Penale ndaj Drejtësisë.
Pra kallëzimi i rremë synon të konfuzojë drejtësinë.
Që të gjendemi përpara akuzës për Kallëzim të Rremë, duhet të të kesh bërë një kallëzim në Prokurori si fillim. Pastaj kjo e fundit çmon nëse kallëzimi i bërë ka patur ndonjë qëllim nga ato që përmban neni 305 apo jo. Pra, kallëzimi që të jetë i rremë duhet të rrëfjë një krim që ska ndodhur apo është bërë për të filluar një çështje ndaj dikujt padrejtësisht.
Asnjëri nga ata persona, që sot Prokuroria i ka akuzuar dhe në pretencën e saj ka kërkuar dënim, NUK BËRI KURRË NJË KALLËZIM në Prokurori.
Pra të akuzosh për Kallëzim të Rremë, pa kallëzim fare quhet NONSENS juridik. Lajthitje e rëndë në objekt e në ligj.
Nuk po i hyj përmbajtjes së denoncimit publik që ata persona bënë ndaj vëllait të ish ministrit të brendshëm, sepse fakt është se ata nuk gënjyen. Vëllai i ish ministrit gjendet tashmë në burg si rezultat i këtij denoncimi publik. Pra edhe sikur, për një moment të pranojmë nonsensin e prokurorisë, denoncimi tregoi një fakt të vërtetë.
Kjo është turp, jo akuzë!
Shpresoj që Gjykata ta hedhë në kosh të plehrave këtë akuzë e bashkë me të të gjithë këtë praktike, të rrezikshme për drejtësinë.
