Një oficer i RENEA-s ka rënë në një greminë mëngjesin e sotëm, ndërsa po shëtiste në një zonë të thepisur në malin e Zorgjit, Dukagjin.
Bledar Beluli ka rënë në greminë nga një lartësi e konsiderueshme, dhe nxjerrja e tij është e vështirë për shkak të terrenit.
Raportohet se efektivi i RENEA ka marrë dëmtime në gjymtyrët e poshtëm. Të parët që kanë mbërritur në ndihmë të efektivit kanë qenë banorë të zonës.
Ndërkohë që pritet një ndërhyrje nga ajri për të nxjerrë efektivin nga gremina, për shkak se terreni i thyer nuk lejon transport në rrugë tjetër.
Efektivi Beluli është rrëzuar që në orën 7:30 të mëngjesit dhe pavarësisht informacionit për rrëzimin e tij strukturat shtetërore po veprojnë me shumë ngadalësi ndërsa jeta e tij është në rrezik, raporton korespondenti i Panorama.
Një grup i FNSH Shkodër janë nisur drejt vendit të ngjarjes ndërsa aty ndodhen edhe disa banorë por është e pamundur që efektivi i rrëzuar të nxirret fizikisht.
Ai ka rënë rreth 100 metër poshtë një shkëmbi në një terren tejet të thepisur që nuk lejon ecjen në këmbë dhe asnjë lloj veprimi tjetër.
