Partizani vijon përgatitjet për ndeshjen e parë të “play-off”-it të Ligës së Europës, që do ta luajë më 18 gusht në Rusinë e largët, ndaj Krasnodar. Ky kundërshtar nuk ka histori të gjatë, sepse është themeluar si klub në vitin 2008, por me potencialin financiar ka arritur të ndërtojë një skuadër shumë të fortë. Për këtë nuk ka pikë dyshimi te “demat e kuq”, të cilët kanë ndjekur dje ndeshjen e Krasnodar ndaj Terek Grozny, e vlefshme për javën e dytë të Superligës Ruse. 4-0 kanë fituar rivalët e Bekim Balajt dhe Odise Roshit, duke iu dërguar përmes tyre sinjal të qartë shqiptarëve (por jo vetëm) të tjerë të Partizanit. Por, më shumë se kaq, Krasnodar ka zgjedhur t’i kërcënojë edhe me diçka tjetër 15 herë kampionët e Shqipërisë, me ekzekutimin “fotokopje” të penalltisë sipas stilit “Messi-Suarez”.
Një kundërpërgjigje kjo për penalltinë alla “Panenka” të Alban Hoxhës ndaj Ferencvaros, si për të thënë se nga pika e bardhë nuk të fal skuadra ruse. Sikurse duket edhe në video, lojtari që merr përsipër ekzekutimin e penalltisë për Krasnodar Mamaev, niset të godasë topin, por më pas e pason atë te Smolov, si të ishte goditje dypasimëshe, duke e nxjerrë jashtë loje portierin kundërshtar. E njëjta skemë që përdori sezonin e kaluar, në një ndeshje të La Liga-s, (ndaj Celta Vigo 6-1) edhe Messi, që kombinoi me Suarez, ekzekutim që bëri xhiron e botës dhe u krahasua me një veprim të tillë të Johan Cruyff vite më herët, kur legjenda holandeze luante me Ajax.
