Riparimet e të gjitha dëmeve në pallatet e dëmtuara në Durrës do të bëhen nga ndërtuesit që i kanë bërë këto ndërtesa, nën supervizimin e rreptë të grupeve të inspektimit.
Kështu u shpreh Kryeministri Edi Rama në mbledhjen e sotme të qeverisë, ndërsa kërkoi që brenda ditës së sotme të sigurohet edhe lista e ndërtuesve, ndërtesat e të cilëve kanë pësuar dëmtime.
“Sot brenda dites duhet të merret në Bashkinë e Durrësit lista e ndërtuesve të të gjitha pallateve të dëmtuara, nëse nuk paraqiten vetë, të njoftohen të paraqiten dhe të marrin përsipër të bëjnë riparimet e gjithë dëmeve të shkaktuara. Por nën supervizimin e rreptë të grupeve të inspektimit”, tha Rama.
Në vijim, ai u shpreh se një ide të qartë me godinat për të cilat duhet të bëhet kujdes do të mund të krijohet pas mbledhjes së ekspertëve dhe inxhinierëve.
“Në të gjitha kontaktet që unë kam pasur, edhe me disa nga grupet inxinierike, masat në skuadrat tona janë jashtë zakonisht pozitive.
Grupit të tjera kanë ardhur dje, të tjera pritet të vijnë në vijim. Do t’u japim njerëzve garanci që godinat nuk përbëjnë rrezikshmëri dhe njëkohësisht duhet të vëmë në kryq të gjithë godinat që duhen shembur.
Ditën e premte përfaqësuese të ekspertimit të godinave do të paraqesin për publikun raste dhe tipologji ndërtimesh për të treguar se nga dhe për çfarë duhet të ketë një shqetësim.
Pastaj në çdo rast duhet të bëhet ekspertimi i veçantë. Të premten do të ndiqni nga goja e atyre që dinë se çfarë flasim”, tha Rama.
