Qeveria ka zhvilluar mbledhjen e rradhës së jashtëzakonshme lidhur me situatën e krijuar pas tërmetit shkatërrimtar të 26 nëntorit, që shkaktoi 51 viktima dhe 900 të plagosur.
Zv. ministri i Infrastukturës, Artan Shkreli, tha se në ditët në vazhdim mund të ketë lëkundje sizmike më të lehta pasi energjia sizmike është në rënie.
“Në ditët në vazhdim mund të ketë lëkundje më të lehta sepse energjia sizmike vjen në rënie. Në rastet që kemi gjetur ne gjatë operacioneve, kanë shpëtuar njerëz që kanë qenë, poshtë krevateve, poshtë tavolinave pra nën objekte që kanë trarë.
Nuk duhet qëndruar pranë mureve por në qendër. Katet e para mund të dalin menjëherë, ndërsa katet e tjera duhet të presin një pausë. Katet e larta kanë më pak propabilitet për t’u shembur. Sizma më e madhe ka kaluar. Kjo është një gjë që nuk ka vend për një panik”, tha Shkreli.
Ndërsa, ministrja e Infrastrukturës Belinda Balluku deklaroi se në terren janë vendosur ekspertë të huaj të udhëhequr nga ato shqiptare.
“Grupet, të cilat operojnë në terren janë grupe mikse të udhëhequra nga ato shqiptare, të cilët njohin terrenin, me grupe të huaja, që i janë përgjigjur pozitivisht thirrjes.
Sot operojnë 40 italianë, 16 grekë, 11 turk, një grup i madh inxhinirësh nga Kosova të cilët kanë inspektuar shkollat. Inxhinierët francezë janë në Tiranë. Kemi grupe nga Bullgaria, Hungaria, Rumania.
Agjencia Ndërkombëtare Bërthamore do të dërgojë ekspertët e saj në Shqipëri”, tha Balluku.
