Marco Asensio ka magjepsur Zidane: talenti 20-vjeçar spanjoll, i marrë nga Mallorca në 2014-ën, i cili i ka kaluar dy sezonet e fundit i huazuar, është kthyer në bazë, me dëshirën dhe vendosmërinë për të siguruar një vend në organikën galaktike të kampionëve të Europës. Aftësitë e tij kanë befasuar Zidane, i cili nuk ka humbur rast për t’i bërë elozhe lojtarit publikisht.
Një shpërthim i shpejtë dhe ndoshta i papritur, që duket se ka bindur trajnerin francez që ta konfirmojë Asensio-n në organikën e Real Madrid për sezonin 2016-17. Problemi është se madrilenët kanë shumë alternativa në mesfushë, nga Kroos te Modric, nga Kovacic te James Rodriguez dhe Isco. Për këtë arsye “Los Blancos” mund të vendosin të sakrifikojnë një nga talentet për t’i bërë vend fantazistit të ri: në krye të listës së “të padëshiruarve” është Isco, i cili kërkon më shumë hapësirë, por që Real nuk mund t’ia garantojë.
Sipas “Mundo Deportivo”. Isco mund të largohet përfundimisht nga Madrid, për t’u transferuar te një skuadër ku mund të shpalosë talentin e tij. Fantazist, sulmues krahu, mesfushor, Isco ka treguar se mund të mbulojë shumë pozicione. Një elasticitet taktik që trajnerët e tij e kanë vlerësuar gjithmonë, pa harruar edhe aftësitë e tij të mëdha teknike. Bëhet fjalë për një lojtar të ri (24 vjeç) me eksperiencë ndërkombëtare, që është mësuar të luajë në skena të rëndësishme.
Karakteristikat e tij do t’i bënin shumë punë një ekipi si Milan që është interesuar për të në të kaluarën. Pas shitjes së klubit kuqez, që do të sjellë më shumë para në arkat e ekipit, Isco mund të jetë më i përballueshëm për milanezët, të cilët po e ndjekin me shumë vëmendje zhvillimin e situatës në shtëpinë “merengues”, ku pëlqehet edhe ish-lojtari i Inter, Mateo Kovacic.
