Britania e Madhe ka nisur të kthejë në Vietnam trupat e 39 personave të vdekur që u zbuluan më 23 tetor në një kamion frigoriferik. Ata po udhëtonin përmes Belgjikës drejt Anglisë për shkaqe ekonomike.
Mes 16 viktimave që mbërritën të mërkurën në aeroportin e Hanoit, dhjetë prej tyre mendohet se janë adoleshentë dhe dy 15-vjeçarë. Procesi i riatdhesimit nga Europa u ka kushtuar familjarëve vietnamezë mijëra dollarë.
Ministria e Jashtme e vendit tha se atyre u është sugjeruar varianti më i lirë i djegies së trupave në kremator dhe transporti i hirit me vlerë 1.700 dollarë.
Shumica e familjeve nga provincat e varfra të Vietnamit thonë se kanë marrë borxhe për t’i transportuar personat e dashur me arkivol, që kushton 2.800 dollarë.
Disa organizata bamirësie vietnameze kanë mbledhur para që do u shpërndahen personave të prekur.
Ndërkaq, dy shtetas irlandezo-veriorë këtë javë u shpallën zyrtarisht përgjegjës për ngjarjen dhe për organizimin e emigracionit të paligjshëm në këmbim të vlerave monetare.
10 të dyshuar të tjerë po hetohen nga Vietnami.
LEXO EDHE:
39 trupat e vdekur në kamionin frigoriferik, shoferi pranon akuzat
