Ka rënë nata dhe operacionet e kërkim shpëtimit të banorëve që mbetën nën rrënoja pas tërmetit është vështirësuar. Por nga Durrësi kryesisht, falë përpjekjeve heroike të grupeve të shpëtimit, ka edhe nga ata të cilët mbushin me shpresë ata të cilët ende nuk kanë gjetur të afërmit e tyre.
Para pak çastesh në objektin gjashtëkatësh të rrëzuar në Durrës (Hotel Mira Mare) janë nxjerrë nga gërmadhat dy persona.
Fillimisht është nxjerrë një grua rreth të 40-ve e cila kishte marrë shumë lëndime dhe u dërgua me urgjencë në spital, me shpresë se do të kalojë rrezikun.
Më pas u nxor edhe një burrë, i cili pavarësisht orëve nën rrënoja dukej në gjendje më të mirë dhe jashtë rrezikut për jetën.
Por gruaja e të mbijetuarit është ende nën rrënojat e godinës së shembur dhe po tentohet të nxirret jashtë nga forcat e emergjencës, me shpresë se edhe ajo do të jetë gjallë.
Janë momente dramatike dhe orë të vështira për shqiptarët.
Teksa përcillej me barrelë drejt ambulancës, burri që u shpëtua, thërriste dhe kërkonte gruan e tij.
Duhet theksuar se një ndihme të jashtëzakonshme ka dhënë edhe grupi nga Kosova, i cili bashkë me qentë e stërvitur për raste të tilla kanë ndihmuar në evidentimin e zonave ku kishte njerëz nën rrënoja. Kërkimet edhe pse natë vazhdojnë me shpresë.
