Është rritur në 13 numri i viktimave nga tërmeti shkatërrues që goditi vendin mëngjesin e sotëm.
Sipas informacioneve zyrtare nga Ministria e Mbrojtjes, shumica e viktimave humbën jetën pas shembjes së banesave apo objekteve ku ata qëndronin në Durrës e Thumanë, si pasojë e lëkundjeve të forta. “7 persona konfirmohet se janë nxjerrë të pajetë nga rrënojat në Durrës dhe 5 në Thumanë. 39 persona janë shpëtuar në dy zonat e po marrin ndihme mjekësore”, konfirmoi MM. Të njëjtat burime thanë se një person humbi jetën në Kurbin, ku një burrë u hodha nga banesa prej panikut nga tërmeti.
Ndërsa një tjetër, teksa ishte nën drejtimin e automjetit, u ça rruga dhe ai pësoi aksident duke humbur jetën. Fillimisht u raportua se çarja e rrugës dyshohet se ndodhi për shkak të tërmetit, ndërsa më vonë autoritet thanë se kjo nuk është konfirmuar ende.
Qindra persona kanë mbetur të plagosur nga tërmeti me magnitudë 6.4 që goditi rreth orës 4 të mëngjesit, me epiqendër në Adriatik, 16 km nga Shijaku dhe 34 km nga Tirana. Ka ende persona të bllokuar nën rrënoja dhe ekipet e emergjencës po punojnë për shpëtimin e tyre. Dëmet materiale janë të konsiderueshme.
Ministria e Arsimit ka njoftuar mbulojën e shkollave në të gjithë vendin sot dhe nesër. Ndërkohë, IGJEUM, edhe pse ka raportuar se goditja kryesore ka kaluar, ka këshilluar qytetarët në zonën epiqendrore të qëndrojnë jashtë pasi pasgoditjet që përvijojnë mund të shkaktojnë dëmtime të mëtejshme.
Policia ndërkohë u ka bërë thirrje qytetarëve në zonat e prekura nga tërmeti që të kufizojnë lëvizjet me mjete për t’u dhënë mundësi autoriteteve dhe shërbimeve të emergjencave civile të qarkullojnë lirshëm në rrugë, për t’ju ofruar ndihmën e nevojshme banorëve të lënduar nga pasojat e tërmetit.
