Barcelona ka arritur një fitore mjaft të vështirë me përmbysje ndaj Leganes me shifrat 1-2.
Leganes kaloi në avantazh me anë të En Nesyri në minutën e 12-të, i cili realizoi një gol spektakolar duke e lënë Ter Stegen në vend.
Më pas Barcelona u përpoq të reagojë duke e zotëruar topin por pa rrezikshmërinë e duhur në pjesën e parë, e cila u mbyll në avantazh të Leganes.
Ndërsa me fillimin e pjesës së dytë, Suarez me një kërcim të fuqishëm me kokë, duke përfituar nga krosi i Messit, realizoi golin e barazimit në minutën e 53-të.
Për të freskuar skuadrën, Valverde, ndërhyri duke bërë tre zëvendësime, ku u inkuadruan në minutën e 57-të, Rakitic dhe Arturo Vidal, në dëm të Busquets dhe Griezmann. Ndërsa në minutën e 70-të, De Jong i la vendin 17 vjeçarit Fati.
Ishte pikërisht Arturo Vidal i futur në fushën e lojës në të 57-ën, ai i cili i dha tripikëshin skuadrës së Barcelonës, duke përfituar nga një rrëmujë në zonë dhe duke shtyrë topin drejt rrjetës.
Me këtë fitore Barcelona ngjitet në kuotën e 28 pikëve, duke kryesuar e vetme tabelën ndërsa pret rezultatin e Real Madrid ndaj Real Sociedad, ndeshje e cila luhet në orën 21:00.
