Ish-deputetja e PD-së, Albana Vokshi mori pjesë në Kongresin e Partisë Popullore Europiane në Zagreb, ku u zgjodh Presidenti i ri i PPE-së, Donald Tusk, i cili garonte i vetëm.
Në këtë kongres Vokshi ka patur rastin të takojë dhe kancelaren gjermane Angela Merkel, ku nëpërmjet një postimi në Facebook shprehet se e falenderoi për mbështetjen e vazhdueshme që qeveria gjermane dhe ajo, personalisht, kanë dhënë për forcimin e demokracisë, zhvillimin dhe nxitjen e proceseve integruese në Shqipëri.
Duke postuar dhe një foto bashkë me Merkel, ish-deputetja demokrate shkruan se vullneti i Gjermanisë dhe i vendeve të tjera të BE-së u shpreh i qartë ku duhet të zbatohen kërkesat e rezolutës së PPE dhe Bundestagut por e vetmja pengesë për zbatimin e kërkesave të Perëndimit është qeveria e Shqipërisë
Postimi i plotë:
Me Angela Merkel në Zagreb. 🇩🇪 🇦🇱
Kancelarja mbështet shqiptarët, por ne duhet të zbatojmë kërkesat e rezolutës së PPE dhe Bundestagut.
Gjatë Kongresit të PPE-së në Zagreb, m’u dha rasti të përshëndetesha me Kancelaren Angela Merkel dhe ta falenderoja për mbështetjen e vazhdueshme që qeveria gjermane dhe ajo, personalisht, kanë dhënë për forcimin e demokracisë, zhvillimin dhe nxitjen e proceseve integruese në Shqipëri.
Kancelarja Merkel më siguroi se Gjermania dhe ajo vetë, do të vazhdojnë të mbështesin Shqipërinë dhe shqiptarët.
Vullneti i Gjermanisë dhe i vendeve të tjera të Bashkimit Europian u shpreh i qartë edhe në rezolutën e posaçme të PPE-së, ku kërkohet, para së gjithash, që Shqipëria të zgjidhë krizën e thellë politike dhe, nëpërmjet një reforme të vërtetë zgjedhore, të përgatisë vendin për zgjedhje të lira e të ndershme.
E vetmja pengesë për zbatimin e kërkesave të Perëndimit është qeveria e Shqipërisë.
Edi Rama refuzon të përmbushë kushtet e Bundestagut gjerman dhe të Partive Popullore Europiane. Ai vazhdon të sabotojë ngritjen e Gjykatës Kushtetuse, të shkatërrojë shanset për zgjedhjet të lira e të ndershme dhe të zhbëjë çdo përpjekje për një drejtësi të pavarur.
Rruga e vetme për ne është Perëndimi!
Shqipëria si Europa është ajo që duan shqiptarët dhe ne do ta arrijmë së bashku!
