Kryeministri Edi Rama shpërndau sot në profilin e tij zyrtar në rrjetet sociale një hartë të Ballkanit, ku Kosova përfshihej si pjesë e Serbisë.
Media serbe B92 nënvizon se pas këtij skandali me hartat, “Prishtina është në shok”.
Ndërkohë që postimi i një harte të tillë ka sjell reagime të shumta, jo vetëm në Tiranë, por edhe në Prishtinë.
I pari që ka reaguar ka qenë zyrtari i LDK-së, Arben Gashi, i cili ka pyetur Ramën se ku është Kosova. “I padashtun kryeministër, ku është Kosova?”, pyet Gashi.
Ish-kryeministri i Shqipërisë Sali Berisha, në reagimin e tij tha se ky është një akt i lartë tradhtie.
Referuar reagimeve të shumta, Kryeministri apo stafi i tij, është detyruar të fshijë hartën e parë, duke emetuar një tjetër hartë, ku është edhe Kosova.
Për të bërë përditësimet, Ramës apo të besuarve të tij, i janë dashur plot 4 orë.
Ndoshta, me një lojë të tillë, Rama ka dashur të tërheqë vëmendjen nga zhvillimet e fundit politike në vend, ku ai dhe kreu i KED-së, ndodhen në akuza për kapjen e Gjykatës Kushtetuese.
