Presidenti Ilir Meta shpalli një ditë më parë Bernd Borchardt, kreun e Prezencës së OSBE-së në Tiranë, person të padëshiruar.
Reagimi i Metës erdhi pasi Borchardt u pozicionua kundër dekretit të Kreut të Shtetit lidhur me shtyrjen e mbajtjes së zgjedhjeve vendore më 30 qershor, dhe pas veprimit të tij, duke ngritur gishtin e mesit ndaj disa protestuesve, në qendër të Tiranës.
Lidhur me vendimin e Metës, ka reaguar indirekt edhe Zyra qendrore e OSBE në Vjenë.
“OSBE e mban shënim këtë notë verbale lëshuar nga zyra e presidentit. Për aq kohë sa ne qëndrojmë partnerë të Shqipërisë, OSBE inkurajon dialogun dhe bashkëpunimin me institucionet shqiptare, e po ashtu mbetet e vendosur në ofrimin e ndihmës specifike, në avancimin e axhendës së vendit”, ka thënë zëdhënësja e OSBE, Mersiha Čaušević Podžić, raporton Top Channel.
Para disa javësh, në hyrjen e pallatit ku ka apartamentin kreu i Prezencës së OSBE-së, u shkruajt parrulla “Borchardt shame on you” (Boshard turp të kesh”).
Reagimi i një grupi të rinjsh, erdhi pasi Borchardt, përmes një deklarate dënonte protestat e opozitës, kundër Kryeministrit Edi Rama.
Deklarata theksonte se “organizatorët e protestës duhet të mbajnë përgjegjësinë politike për dhunën kriminale të ushtruar nga disa prej ndjekësit e tyre. Mendimet tona shkojnë me familjet e të plagosurve.
OSBE-ja do të vijojë të nxisë opozitarizmin efikas dhe dialogun në Shqipëri. Por ne i dënojmë plotësisht ata që përpiqen të përdorin dhunën si një rrugë të shkurtër politike; ata do të dështojnë”.
Reagimi në atë kohë i Prezencës së OSBE ishte pothuajse i njëjtë me atë të qeverisë, ndërkohë së zyra në Tiranë, në asnjë moment nuk ka dënuar apo reaguar ndaj dhunës policore dhe gazit toksik që është hedhur edhe ndaj të moshuarve apo fëmijëve.
