James Harden është kthyer në një fenomen të vërtetë. Sezonin e kaluar “mjekroshi” e mbylli sezonin me një mesatare pikësh të shënuar prej 36.1 pikësh, diçka e pazakontë në NBA-në moderne që nga sezoni 2005-2006, ku Kobe Bryant e mbylli sezonin me një mesatare prej 35.4 pikësh.
Por këtë sezon Harden vazhdon të thyejë rekorde, pasi deri më tani në 13 ndeshje të zhvilluara mesatarja e tij për ndeshje arrin kuotën e 39.5 pikësh, diçka e vështirë për tu mbajtur por jo e pamundur për të.
Duke shfrytëzuar këtë performancë të Harden, Houston Rockets arrin fitoren e shtatë radhazi duke mundur Minesota Timberwolves me rezultatin 125-105.
Në ndeshjet e tjera në NBA, kampionët e fuqi të NBA, Toronto Raptors, u dorëzuan në fushën e Dallas Mavericks me rezultatin 110-102. I zakonshmi Luka Donciç rrëmbeu skenën në “American Airlines Center” të Dallasit me 26 pikë, 15 “rebound” e 7 asiste, duke qenë frymëzuesi i këtij suksesi të Mavericks, i 7-ti në këtë fillim sezoni.
Gjithçka e lehtë për Milwaukee Bucks, që u kthyen me fitore nga Indiana, pas suksesit 83-102 ndaj Pacers. Provë “normale” për Giannis Antetokounmpo, që e mbylli takimin me 26 pikë dhe 13 topa në tabelë.
