Pedro Luca ka 40 vite që jeton në një shpellë, në Argjentinë. 79-vjeçari mbijeton pa elektricitet në shpellën e tij që ndodhet në një mal të provincës veriore Tucuman.
Kur e merr uria, ai vendos në krahë çiften e tij dhe del për gjah, ndërsa ujin e merr nga një përrua afër vendbanimit të tij. “Është uji më i pastër dhe më i mirë në botë”, thotë Pedro.
Dita e tij nis duke ndezur një zjarr, pasi, sipas tij, “zjarri është magjik”. Luca është bërë shumë i famshëm në San Pedro de Colalao dhe kur i bie rruga pranë shpellës, banorët i çojnë ushqime dhe gjëra për të cilat ka nevojë.
Me pensionin e qeverisë (150 dollarë) ai blen qirinj, ndërsa pajisja e vetme teknologjike që zotëron është një radio e vogël, por e ka të vështirë të kapë stacione pasi në mal nuk ka shumë valë.
Luca thotë se që kur ishte i vogël dëshironte të jetonte në kushte të tilla dhe shprehet se kurrë nuk e ka pyetur veten se pse jeton në shpellë. Thjesht, ka dëshirë.
