Sot, ora 18:00, luhet në “Selman Stërmasi” ndeshja mes Tiranës dhe Vllaznisë e vlefshme për javën e 12-të, të Superiores, një përballje historike kjo mes skuadrave me rivalitet të fortë.
Ky duel shpesh është quajtur edhe si “klasikja e futbollit” në vendin tonë.
Për sa i përket gjendjes së skuadrave, të dy ekipet ndonëse në pozita të kënaqshme në klasifikim, kanë treguar luhatje në këtë fillim sezoni, që ka sjellë ndryshimin e trajnerit të bardheblutë dhe ka bërë që tekniku e shkodranëve të ofrojë vetë dorëheqjen.
Kjo ndeshje merr një rëndësi të veçantë për vijimësinë e kampionatit dhe pretendimet që kanë, pasi të dyja skuadrat kërkojnë pikë për të përforcuar pozitat në klasifikim.
Nëse do të vinim re statistikat, ato flasin për Tiranën, pasi tregojnë që bardheblutë janë dominues në 20 ndeshjet e fundit te luajtura mes dy skuadrave.
Bardheblutë regjistrojnë 8 fitore kundrejt 3 të ekipit shkodran në këtë periudhë, ndërsa skuadrat kanë ndarë pikët në 9 barazime. Për më tepër, Tirana ka humbur vetëm 1 nga 10 ndeshjet që ka luajtur në këtë periudhë kohe në fushën e saj, (5 fitore, 4 barazime).
