Fushata presidenciale e Hillary Clintonit është sulmuar nga hakerët në kuadër të aksionit më të gjerë kibernetitk kundër institucioneve të Partisë Demokratike në Shtetet e Bashkuara, kanë raportuar mbrëmë mediat amerikane.
Zyrtarët e inteligjencës së Shteteve të Bashkuara dhe ekspertët privatë, besojnë se sulmet kibernetike ishin kryer nga agjentët që punojnë për qeverinë e Rusisë. Sulmuesit kanë lënë gjurmë, të cilat i identifikojnë ata si rusë, dhe kanë përdorë mjete në të cilat kanë qasje vetëm qeveritë.
Disa kanë shqetësim se Rusia ndoshta po përpiqet të ndikojë në zgjedhjet presidenciale. Këtë javë presidenti amerikan, Barack Obama, e ka shtruar çështjen e një mundësie të tillë.
Qeveria e Rusisë fuqishëm i ka hedhur poshtë akuzat, duke i përshkruar ato si “helmuese” dhe simptoma të “paranojës antiruse”, që shpeshherë i përfshinë fushatat presidenciale amerikane.
