Liverpool do të luajë ndaj dy skuadrave të ndryshme në dy kompeticione të ndryshme brenda 24 orëve, pasi “EFL” deklaroi që data e çerekefinales së “Carabao Cup”, që Liverpool do të luajë ndaj Aston Villas nuk do të ndryshojë.
“Të kuqtë”, do të luajnë në transfertë ndaj Aston Villa, më 17 dhjetor në orën 19:45 dhe do të luajnë gjysmëfinalen e botërorit të klubeve, më pak se 24 orë më vonë, më datë 18 dhjetor, ora 17:30.
Në lidhje me këtë situatë Liverpooli doli me një deklaratë ku thotë:
“Ne dëshirojmë të falënderojmë EFL, për përpjekjet e tyre për të na akomoduar dhe mund të konfirmojmë se janë diskutuar data alternative, por në fund të fundit asnjë nuk u konsiderua e përshtatshme pa kompromentuar caktimin e vetë kompeticionit.
“Për pasojë, do të mundohemi të ndërtojmë dy skuadra, me një për të luajtur në ndeshjen e botërorit, dhe tjetrën në “Carabao Cup”.
“Klubi do të donte të shfrytëzonte këtë rast për të nënvizuar, se ndërsa ky nuk është një skenar ideal, ai është një përfundim i cili u arrit me interesat më të mira të kompeticioneve, klubeve të tjera dhe vetë neve si faktori i vetëm motivues”.
